Горӧдана сёрникузяяс

Кор сёрникузяыс горӧдана, а кор абу горӧдана?

Мый петкӧдлӧ горӧдана сёрникузяыс?

120 удж. Мӧвпыштӧй, мый колӧ вӧчны тайӧ удж сертиыс.

1. Бӧръя урокыс оз ло. 2. Бӧръя урокыс оз ло? 3. Бӧръя урокыс оз ло! 4. Кутам садитны пуяс. 5. Кутам садитны пуяс! 6.Кутам садитны пуяс? 7. Кыдзи нӧ школа йӧрыс пуястӧгыс?!

· 1.Мый тӧдчӧдінныд горӧдан паса сёрникузяяссӧ лыддигӧн?

2.Мыйла бӧръя сёрникузя помас кык сикас пас?

121 удж. Лыддьӧй, тӧдмалӧй, мый петкӧдлӧ горӧдана сёрникузя.

Сёрниӧ тшӧкыда пыртам горӧдана сёрникузяяс. Горӧдана шуанногыс лӧсялӧ юӧртана, юалана, чуксалана сёрникузяяслы, кор найӧс шуам кутшӧмкӧ ловруӧн, сьӧлӧмкылӧмӧн: радлӧмӧн либӧ шогсьӧмӧн, жаляддза либӧ скӧра, чуймӧмӧн либӧ нимкодясьӧмӧн да с.в. Ӧшинь улын быдмӧ пелысь. Менам радейтана пуӧй! Любӧ видзӧдны тэ вылӧ! Дыр на быдмы да гажӧд миянӧс!

Гижигӧн горӧдана сёрникузя колӧ помавны горӧдан пасӧн. Кодкӧ сьӧмӧснас льӧм пу вожсӧ чегӧма. Видзӧдлы, видзӧдлы!

Юалана-горӧдана сёрникузяын юалӧмыс кольӧ вочакывтӧг. Виддзыс уна рӧма лоӧма. Кутшӧм сӧмын дзоридз сэні абу?!

122 удж. Велӧдчӧй лыддьыны пунктуация пасъяс пыдди пуктӧмӧн, шуанногтӧ вежлалӧмӧн. Лыддьӧй Степан Раевский висьтысь юкӧн.

– Дед, а дед! Видзӧд, миян кыдз вылӧ гӧрд коръяс петӧмаӧсь.

Збыльысь ӧд! Me видзӧдлі и чуйми: быд ув вылын, быд ув вожын дӧлалӧны гӧрд лестукторъяс. Сё мокасьтӧ, да тайӧ жӧ жоньяс! О, мичаысь-мича лэбачьяс! Кытысь тi аддзинныд татшӧм шуштӧм луннас алӧйгӧрд кыа краскасӧ да мавтінныд морӧснытӧ? Кӧдзыдысь повтӧм муса лэбачьяс, ывлавыв мичмӧдысьяс! Кодi бара, майбыр, кужлӧма бӧрйыны да сетны татшӧм мича нимсӧ?! Жонь!...

· Тӧданныд-ӧ, кыдзи артмӧма лэбачыслы жонь нимыс?

123 удж. Лыддьӧй текстсӧ, содтӧй ассьыныд тӧдӧмлунтӧ лэбач йывсьыс.

Жонь – кöдзыдысь повт…м ичöтик лэбач. Кöдзыд лунъяс… жоньяс йöжгыльтчöма…сь пу вылын да гажаа сьыл…ны: «Ж-ж-нь-нь! Ж-ж-нь-нь!..» Сьыланног сертиыс и нимт…ма…сь тайö лэбачс… жонь…н.

Жонь – мича лэбач! Сылӧн морöсыс алöйгöрд рӧма. Юр вылыс, бордйыс да бöжыс смоль сьöдӧсь. Позсö жоньяс вӧчӧны коз пулöн сук лапъяс пöвстö.

· 1.Тӧдмалӧй текстлысь сикассӧ. Кутшӧм сёрникузяяс артмӧдӧны текстсӧ?

2. Кымын абзац текстас? Гижӧй первой абзацсӧ шыпасъяс содталӧмӧн.

124 удж. Гижӧй нӧдкывсӧ сёрникузяяс помас колана пасъяс содтӧмӧн.

Гӧрдов морӧс, чукля ныр,

Пуысь пуӧ жбыр да жбыр

Тӧвбыд колскӧ: жбонь да жбонь

Ай да лэбач

Тайӧ – … (А.Шебырев)

125 удж. 1.Лыддьӧй сёрникузяяссӧ радлӧм, шогсьӧм, жалитӧм, скӧрмӧм, чуймӧм, нимкодясьӧм петкӧдлӧмӧн.

Локтӧй татчӧ. Та дыра узян. Видзӧдлы ӧшиньӧ. Тырмас ышмынытӧ. Коді нӧ мачнас керкаын дурӧ.

2. Лыддьӧй ӧти сёрникузясӧ уна шуанногӧн.

Усьӧ лым, пушыд лым.

Т Горӧдана сёрникузялӧн … шуанног.

Горӧдана сёрникузяӧн петкӧдлам …