Сёрникузя артмӧ вежӧртасӧн, грамматика боксянь, шуанногӧн йитчӧм кывъясысь. Сёрникузяӧн висьтавсьӧ помасьӧм мӧвп

Сёрникузяӧн ми вермам шыӧдчыны код дорӧ кӧ, мыйкӧ тшӧктыны, корны, юавны, вӧзйыны. Тайӧ тыдовтчӧ сёрникузясӧ шуанногысь. Гижигӧн петкӧдлыссьӧ пунктуация пасъясӧн: чут, юалан пас, горӧдан пас (.?!)

Кодзувкотъяс жуӧны. Кытчӧ найӧ тэрмасьӧны? Ёна жӧ тэрыбӧсь! (С.Раевский) Керкаӧй-матушкаӧй, лэдз узьны! (Фольклор)

Быд сёрникузяын эм грамматика подув: тайӧ подувпас да юӧрпас, либӧ кодыскӧ ӧтиыс. Сёрникузя вермӧ лоны и ӧти кывйысь. Гажа яг. Пуяс да изъяс вомӧн визувтӧ ичӧтик ёль. А ваыс!

Сёрникузя позьӧ петкӧдлыны схемаӧн..?!

112 удж. Лыддьӧй текстсӧ медводз ас кежысь. Сэсся лыддьӧй гораа, пунктуация пасъяс сертиыс шуанногсӧ вежлалӧмӧн. Кымын сёрникузя текстас?

Анна босьтіс киас гырысь пемыдлӧз тусьяс. Кутшӧм мичаӧсь! Кутшӧм чӧскыдӧсь! Но кутшӧм ньӧжйӧ тырӧ дозйыс! Мыйла тадзи артмӧ? Тусьӧн-тусьӧн вотан, дӧзман, мудзтӧдзыд лоӧ. А рытнас гортсаяс чӧскыд чӧдъя йӧв юасны да ошкасны вотысьӧс. Тайӧ и бурыс! (Е.Козлова серти)

113 удж. Лыддьӧй, сэсся гижӧй текстсӧ сёрникузяяс вылӧ юклӧмӧн. Визьнитӧй быд сёрникузяысь подувпассӧ да юӧрпассӧ.

Коли шоныд гожӧм локтіс, малыштіс ар нора ышловзис вӧр киссьӧ-гылалӧ

кор сынӧдыс ыркалӧ, кӧдзалӧ ас му эновтісны сьылысь лэбачьяс воӧма ар кыйсьысьяс мунӧны вӧравны (Тима Вень серти)

114 удж. Гижӧй сёрникузяяссӧ, содталӧй пунктуация пасъяс. Гӧгӧрвоӧдӧй, мый серти тӧдмалінныд, кутшӧм пас колӧ пуктыны. Торйӧдӧм сёрникузяяссьыс визьнитӧй грамматика подувсӧ.

Садьми пон увтӧм шыӧ Шондіыс дзирдаліс вылын нин Кватитчи, а вугыр шатинӧй абу Коді нӧ эськӧ пышйӧдіс А мый нӧ тайӧ Каститчӧ али мый Менам шатинӧй ӧтнас мунӧ Ме чуйми да вӧтчи сы бӧрся Аддзи да шӧйӧвоши Коньӧрӧй дай петушокӧй (И.Тарабукин серти)

· 1. Мый чуймӧдіс чери кыйысьӧс?

2. Кыдзи помасис лоӧмторйыс?