Сёрникузяын сюрӧса юкӧдъяс

Кутшӧм кывсикасъяспеткӧдлӧны подувпассӧ?

Овлӧ-ӧ эмакывйӧн петкӧдлӧм юӧрпас?

Кор подувпас да юӧрпас костын колӧ пуктыны тире?

140 удж. Лыддьӧй сёрникузяяссӧ, гижӧй сӧмын сюрӧса юкӧдъяссӧ. Тӧдмалӧй, кутшӧм кывсикасӧн петкӧдлӧма подувпассӧ да юӧрпассӧ, пасйӧй.

1.Ивӧ Чуд пӧль ордӧ тшӧкыда кежавлісны челядь. 2. Ивӧ Чуд пӧль тӧдіс уна мойд. 3. Сійӧ зэв кузя да мичаа мойдліс. 4. Пӧль вӧлі неыджыд тушаа, пельк, перыд. 5. Пуясыс ловъяӧсь. Найӧ кылӧны и аддзӧны быдтор. 6. Ивӧ Чуд пӧль – вӧр-васӧ радейтысь морт. (В.Тимин серти)

Кывкӧртӧд: Подувпассӧ петкӧдлӧма эмакывйӧн, нимвежтасӧн.

Юӧрпассӧ петкӧдлӧма кадакывйӧн, кывбердӧн, эмакывйӧн.

· Кыдзи нӧшта петкӧдлыссьӧны сюрӧса юкӧдъяс?

Подувпас – сёрникузяын сюрӧса юкӧд. Сійӧ петкӧдлӧ, коді да мый йылысь висьтавсьӧ сёрникузяын да вочавидзӧ коді? мый? кодъяс? мыйяс? юалӧмъяс вылӧ.

Медтшӧкыда юӧрпас петкӧдлыссьӧ нимтан вежлӧга эмакывйӧн либӧ нимвежтасӧн. Пӧль ноксис пуӧн вӧчасян кӧлуйӧн тырӧм керкаас. Сійӧ вӧчис сюмӧдысь кокни чуман. Подувпас петкӧдлыссьӧ кывтэчасӧн. Комын вок ӧти кӧртӧдӧ кӧртасьӧмаӧсь.

Юӧрпас – сёрникузяын сюрӧса юкӧд. Сійӧ петкӧдлӧ, юӧртӧ, мый висьтавсьӧ подувпас йывсьыс да вочавидзӧ мый вӧчӧ? (вӧчис? вӧчас?) мый сыкӧд вӧчсьӧ? кутшӧм сійӧ? кодӧн либӧ мыйӧн лоӧ сійӧ? юалӧмъяс вылӧ.

1. Зонка (мый вӧчис?) чолӧмасис пӧлькӧд. 2. Быд пу (кутшӧм?) аслыспӧлӧс. 3. Пармаыс (сійӧ мый?) – пӧльлӧн олӧмыс. 4. Вӧр керкаыс (кӧні?) ылын.

Юӧрпас медтшӧкыда петкӧдлыссьӧ кадакывйӧн. Юӧрпасӧн вермас лоны кывберд, эмакыв, нимвежтас, кадакывберд.

Видз вылын сулалӧны кос туруна зорӧдъяс. Зорӧдъясыс гырысьӧсь. Кос турун – бур кӧрым. Кӧдзыд тӧлыс матын нин.

Кор кыкнан подув юкӧдсӧ петкӧдлӧма нимтан вежлӧга эмакывйӧн, сэк на костын сулалӧ тире. Сыктывкар – Коми Республикалӧн юркар.

141 удж. Лыддьӧй кывбурсӧ мичаа, шуанног вежлалӧмӧн.

Изйӧн ворсӧ-тёльӧдчӧ

Котӧртігас шор.

Тӧвруыскӧд колльӧдчӧ

Сылӧн мыла гор.

Асъя кыа туналӧ

Муыслы бур лун.

Мусмас сійӧ уналы

да зэв дыр оз вун. (А.Некрасов (Гамса)

· Гижӧй сёрникузяяслысь подувсӧ, пасйӧй, мыйӧн петкӧдлӧма подувпассӧ.

142 удж. Лыддьӧй сёрникузяяссӧ, подувпассяньыс юӧрпас дорас сувтӧдӧй юалӧм. Вӧчӧй кывкӧртӧд, мыйӧн петкӧдлӧма юӧрпассӧ.

1. Гожӧмыд войвылын дженьыд. 2. Гожся войясыд югыдӧсь. 3. Асывсянь рытӧдз челядь сялькӧдчӧны шоныд ваын да гожйӧдчӧны пӧсь лыа вылын. 4. Гож водзын ӧдйӧ косьмис песлалӧм кӧлуй.

· 1. Кутшӧм темаыс сёрникузяясыслӧн?

2. Кутшӧм содтӧд удж позьӧ вӧчны паныдасьысь кывъяс сертиыс?

143 удж. Тӧданныд-ӧ коми газет-журналлысь нимъяссӧ? Тӧдмасьӧй. Лыддьӧй да мӧвпыштӧй, мый оз тырмы сёрникузяясас. Гижӧй колана пунктуация пасъяс пуктӧмӧн.

1. «Би кинь» ичӧт челядьлы журнал. 2. «Йӧлӧга» шӧр арлыда челядьлы лыддьӧм вылӧ коми газет. 3. Редколлегия газет да журнал дасьтысь-вӧчысь войтыр.

144 удж. Паськӧдӧй сёрникузяяссӧ, мед юӧрпасыс вочавидзис мый сійӧ? юалӧм вылӧ.

1. Шыпас куд – … 2. «Коми му» – … 3. «Чушканзі» да «Войвыв кодзув» – …. 4. «Асъя кыа» – … 5. «Яг морт» – …

145 удж. Лӧсьӧдӧй шусьӧгъяс, гижӧй найӧс, визьнитӧй сюрӧса юкӧдъяссӧ.

1. Быд удж … 2. Сямлуныс кыйсьысьлӧн … 3. Зіль морт уджысь … 4. Бур кыйсьысьлы урыд лазъяс … 5. Зіль мортыдлӧн …

некор оз пӧтлы ачыс пырас кок пыдӧсыс век пым муысь петӧ ноп сертиыс тыдалӧ

· 1.Кутшӧм темаыс шусьӧгъясыслӧн?

2. Гижӧй ӧти шусьӧг серти мӧвпалана текст.