Зара-уяч

Теегт йир сәәнәр хувц уйдг Зара-уяч билә. Зуг эн оньг уга болад, юм уйдг дала зүүһән эн-тенд геедг бәәҗ.

Нег дәкҗ Шаазһа, уюлсн бүшмүдән өмсчәһәд, зүүнд бийән хатхад, уурлад, теегәр иим зәңг тархав:

– Зара йир му уяч, уйсн хувцндан зү мартна.

Маңһдуртнь Зараһур Арат ирәд сурна:

– Зара, буйн болтха, нанд бор девл уйҗ ас.

– Иим сәәхн девлән яһад сольхар бәәхмт? – гиҗ Зара-уяч алң болв.

Арат нүдән бүрилһәд*, сүүлән шарвадад келв:

–Нанд туулан девллә әдл девл кергтә, юңгад гихлә бор туула нуурт өөмдг һалудта әвр ни бәәнә. Эн өдр болһн теднлә наадна. Намаг өөрдхлә, һалуд шиигәд чимкхәр седәд көөнә. Бор девлтә болхла,тедн туула гиһәд эндүрх. Тер цагт би һалудиг бәрәд авчкхв.

– А-а-а, чи тиим билч?Йов цааран!Би чамд девл уйшгов!

Арат уурнь күрәд, Зараг идхәр седнә. Зара әрә гиҗ алдрҗ гүүһәд, гертән орад, үүдән хаав. Асхнднь Зараһур Зорхн гиичд ирв. Эдн цә ууһад суула. Зара эврәннь зовлңган келхлә, Зорхн энүнд хойр селвг өгв:

–Негдвәр, Шаазһан келсиг төртән бичә ав!Чамас сән уяч угаһинь мадн цуһар меднәвидн. Хойрдвар, цуг зүүдән хураһад, җиләткдән хатхчк, тиигхлә төрүц геедршго.

Зара бәәсн зүүдән олҗ авад, тоолад, җиләткдән хатхчкад, нүр үздгт бийән хәләв. Шовасн дала зүдтә хувцнь таасгдсн уга.

Цаг давв. Нег дәкҗ Зара делгүр орҗ йовла. Шаазһа энүг үзчкәд, тачкнна:

– Хәләтн, шовһр зүүдтә Зара йовна, шовһр зүүдтә! Шовһр зүүдтә!

Арат энүгинь соңсчкад, гүүҗ ирәд:

– А-а, ода бәргдвч! Би чамаг иднәв, – гиһәд Арат шүүрч авхар седәд, аман зүүнд хатхулна.

Тиигәд Заран зүд энүг үкләснь хальчлв.

___________________________________

Юңгад Шаазһа Зарад уурнь күрв?

Арат юңгад бор девл уюлхар седв?

Зорхна селвг яһҗ Зарад дөңгән күргв?

Текстин зура тогтатн.

♦ Ямаран келлһнә хүв харар барлата?

♦ Туула, зара, шаазһа гидг бәәлһнә нерд ямаран баг киисклһнд орна?

♦ Һалудта, зүүдтә гидг үгмүд тогтацарнь йилһтн, схемсинь бичтн.

*бүрилһх – прищурить глаз

«Харада» гидг дууна айсар.

Уяч

Кенчр, цаасар Сәәхлә Киилг эн уйна,

Кееһә цегдг уйна. Киирәд белг кенә.

Намҗл өөрнь наадна, 2д. Бичкн Сәәхлә иигәд, 2д.

«Нанд шалвр», - гинә. Билгтә уяч болна.

(Нуура Владимир)