Уячин эрдмин тускар медий

Уйн баһ наснасн

Уячин эрдм даснав,

Эдин кизәр хайлго

Эвинь олҗ ишкнәв.

Нааһад, залһад, шиднәв,

Наадһаст хувц белднәв.

(Бембин Тимофей)

***

Кезәнә нег угатя күүкд күн көвүтәһән бәәҗ. Эн йир сәәнәр юм уйдг билә. Нег дәкҗ зәәсңгин күүкн энүгәр бүшмүд уюлна. Күүкд күн түүгинь уйҗаһад, күцц чиләл уга, талдан хотнур кергәрн йовҗ одна. Υдин хөөн зәәсңгин күүкн бүшмүдән авхулна. Элчнр ирәд уяч гергиг хәәнә. Олад авч ирхлә, гергн үнән келәд, асхн күртл күцәх болад, болзг сурна. Элчнр уячиг засгла хархулхар седв.

Көвүнь һазаһас гүүҗ орҗ ирәд, экдән келнә:

– Аак, та өрүнә бүшмүдиг уяд чиләчксн кевтә биләт.

– Я-а-а, дәрк, хойр ханцнь уйгдад уга, ода дарунь чиләһәд өгчкхв,– болҗ гергн элчнрәс дәкн невчкн болзг сурна.

– Аак, та эндүрҗәнәт. Өрүнә чиләчкләт, – гиҗ келәд көвүн, дер дор бәәсн, шар торһн бүшмүд авад үзүлнә.

Экнь дотран алң болад:

– Ю-у-у, хәәмнь. Нам толһам эргҗ оч. Өрүнә чиләчксн бәәҗв, –гиҗ келәд, бүшмүдиг цаһан кенчрт ораһад, элчнрт бәрүлв.

Әәмшгтә улс йовҗ одхла, экнь көвүһән өвдг деерән суулһад, халхаснь үмсв гиһәд Нарн өвгн келврән төгсәв.

( Нармин Морхаҗ)

____________________________________________________________________

Ямаран әәмшгәс көвүнь экән харсч авв?

Көвүн ямаран эрдм шүүҗ авсн болх?

♦ Сурна, үзүлнә гидг үүлдәгчсин суффиксинь олад, цагинь келтн.

♦ Уяч, уюлх гидг үгмүд кедү үзгәс болн әәһәс тогтҗ?

♦ Харар барлата бәәлһнә нердин тооһинь, баг киисклһинь, киисквринь олтн.

Рис. заяц идет к портному-ежу заказывать серую шубку, т.к. пришла весна