Джекинмодн герәс

Деегүрнь утан бүргв*.

Бичкдүд түүмр унтрахар,

Бичкн суулһс авцхаҗ,

Бадмин хаша дунд

Багрлдад күрәд ирцхәҗ.

Күрзәр, суулһсар адһҗ

Күүкд элс зөөцхәнә,

Джек теднлә көөлдҗ

Дахад хүцҗ гүүнә.

Ноха амр бәәхш,

Нааран-цааран хатрна

Көвүдиг эн дураһад

Көдлҗәх болад сахньна.

Түүмрин һал унтрв,

Түргәр гер бәргдв:

Шин герән эргҗ

Шилвкҗ Джек гүүв.

Дотрнь орҗ хәләв,

Дәкн эргҗ хуцв,

– Ханҗанав, үүрмүд, – гиҗ

Хәрү өгсн болв.

(Куукан Анатоль)

______________________________________________________________

Бичкдүд яһҗ түүмр унтрав?

Яһад Джекин гер шатсмб? Тадн юн гиҗ санҗанат?

Кен Джекд шин гер бәрв?

♦ Өңгрсн цагт бәәх үүлдәгчс олтн.

♦ Орч нерд шүүҗ келтн.

♦ Харар барлата бәәлһнә нердин киисквринь,тооһинь, баг киисклһинь зааҗ келтн.

*түүмр – пожар

*бүргх – кружиться

– Түүмр шатхла, яах кергтә?

– 01 гидг тойгар җиңнүләд түүмрчнрт зәңглх кергтә. Шачах герин тойг эрк биш келх кергтә.

– Түүмрчнр юуһар ирнә?

– Теднд шишлң түүмр унтрадг машид бәәнә.

– Түүмрин машин ямаран?

– Улан өңгтә, ик цистернтә, түүмрин шатта.

– Түүмрчнр юуһар түүмр унтрана?

– Усар, эс гиҗ көөсәр.

– Яһад эдн шачах герүр әәлго ордв?

– Эдн шишлң хувцта, толһадан төмр каскта.

– Түүмрчнр ямаран улс?

– Йир зөргтә, чидлтә, оньгта, шулун-шудрмг, күүнд түрүн дөң күргҗ чаддг улс.