Вс хадлһна тускар медий

Өвсиг көкәр хадад,

Өөрән овалад авчкхла.

Залушг баатр хөөчиг

Зутадг үвл бәәдви?

(Калян Санҗ)

***

Хаврт тег йир сәәхн болна. Салькн үләхлә, нигт, белкүсцә көк өвсн теңгсин усн мет, дольгалад бәәнә. Эн – хадлһна һазр.

Өвсн – малын хот. Тегәд мал өскдг әмтн энүг цаглань хадад, зөөҗ авхар зүткнә.

Кезәнә әмтн шалһан эртәснь ясад, өвсиг цаглань хадад, хагсаһад, мөрн тергәр зөөһәд овалад белддг билә.

Хөөннь өвс хадлһнд машид олзлгдг болв. Трактор ардан өвс хаддг маши болн мааҗур* чирнә. Өвс хаддг машин өвсиг хадад, һазрт уңһаһад йовхла, арднь чиргдсн мааҗур өвсиг мааҗурдна. Мааҗурд өвсн хурад ирхлә, өөрнь йовсн хойр күн мааҗуриг өргәд, өвсинь уңһачкна. Эн унсн өвсиг ковньг* гидг билә.

Ода болхла, хадсн өвсиг хагсаҗаһад, шахурар шахад, ик түүдгүд*, эсклә эвтәкн төвмүд* кенә. Төвмүд машинд ачхд амр. Түүдгүд тракторар ачад зөөнә. Иигәд белдсн өвсиг хошин өөр искирдст овална.

(Бембән Һуча)

______________________________________________ ______________

Өвснә хадлһн кезә эклнә?

Кезәнә өвс яһҗ хаддг бәәҗ?

Өдгә цагт яһҗ өвс хадна?

♦ Белкүсцә, хагсаҗаһад гидг үгмүдиг ниилврәр салһад, эгшгин таарлтин зокал келтн.

♦ Текстәс чинрлгч нерд олтн.

♦ Харар барлата үүлдәгчс ирх цагт хүврәтн.

* ковньг – копна

* түүдг – рулон

* төв – тюк

«Харада» гидг дууна айсар.

***

Өргн шалһта машиһәр

Өвсән хурлзулҗ хадна,

Өндр, өргн искрдс 2д.

Өөдлүләд өргүләр овална.

Өвсән цаглань хурахла,

Үвләс гетлхән медцхәнә.

Шар нарна һарцла 2д.

Шамдҗ әмтн нирглднә.

(Эрнҗәнә Константин)