Хулдачин эрдмлә таньлдый

Энчән көвүн Бадм

Эндр багштан келв:

Экиннь эрдм шүүнәв,

Эвлг хулдач болнав.

Хулдач

Υдин хөөн өндр күмтә* машин селәнә делгүрин һаза ирәд зогсв.

Машинә җолач Бамбан Һәрә күмин үүдинь секәд, олн зүсн дегтрмүд зерглүләд тәвц деер тәвв.

Делгүрәс һарсн улс машин тал өөрдҗ ирцхәв.

– Эд-таврас ю гүүлгҗ* йовнат? Өөмсн бәәвзго? Хальмг цә угай? – гиҗ күн болһн кергтә юман сурцхав.

– Уга, би дегтрмүд хулдҗ йовнав. Тадн сул цагтан соньн дегтр умшад, седклән сергәтн. Хулдач әмтнә оньг тусхахар нег дегтр һартан авад:

– Хәләлт, эн дегтр умшлт? Әмтнә кезәңк бәәдлиг шин цага бәәдллә түүрвәч дүңцүләд үзүлҗәнә. Шиңкән барас һарла, ширнь сәәнәр хагсад уга! – гиҗ Һәрә шин дегтрмүд ца-цааһаснь һарһад, әмтнд үзүлнә.

– А, энтн хальмг келәр бичсн дегтрмүдий? Авх кергтә. «Чик хаалһ», «Ольдан күүкн», «Манц һол», «Һалан хадһл» гидг шин романмуд эн җил барас һарв, – гиһәд радиоһар келҗәсинь соңслав. Өгтн нанд, би умшнав, – гиҗ нег шар залу мөңг хулдачд өгв.

– Залус, берәд, күүкд, хулдҗ автн! Хальмг бичәчнрин үүдәврмүд медх кергтә! – гиһәд Һәрә цааранднь дегтрмүд зарлад бәәнә.

( Эрнҗәнә Константин)

__________________________________________________________________

Бамбан Һәрә ямаран хойр эрдмтә?

Хулдач яһҗ дегтрмүд зарлна?

♦ Орч нерд текстәс шүүҗ келтн.

♦ Селәнә, хулдач гидг үгмүд ниилврәр салһтн, эгшгин таарлтын зокал цәәлһтн.

♦ Олн тоод бәәх бәәлһнә нерд келтн, суффиксинь цәәлһтн.

*күмтә машин – машина с будкой

* гүүлгх – продавать

– Бадм, чи өсхләрн ямаран эрдм шүүҗ авхвч?

– Би хулдач болнав.

– Эн эрдм чамд юуһарн таасгдна?

– Хулдачин эрдм ик кезәнәс нааран бәәһә, юңгад гихлә юм хулдҗ авлго күн бәәҗ чадшго.

– Хулдач күн ямаран болх зөвтә?

– Миниһәр, хулдач күн өр-өвч, әмтнлә ээлтә, килмҗтә болх зөвтә.

– Килмҗтә гиснчн юн үгв?

– Хулд кехәр ирсн күүнд хулдач оньган тусхаһад, кергтә селвг өгәд, эд-тавринь шүүҗ авхднь дөң болх йоста гиҗ би санҗанав.

–Ямаран делгүрт көдлхәр бәәнч?

– «Наадһас» – гидг делгүрт.

♦