Сёрнисикасъяс туялан наука шусьӧ диалектологияӧн

· 1. Кымын сёрнисикас Комиын?

2. Мыйла колӧ тӧдны литературнӧй коми кыв?

Сё гӧгӧр во сайын коми гижысьяс да кыв туялысьяс гижлісны ставныс ас сёрнисикас кывъясӧн, сы вӧсна мый гижанног индöдъясыс эз вöвны. Зэв ёна коліс лӧсьӧдны став комилы гöгöрвоана гижан кыв. 1918-öд вося моз (август) тöлысьö Емдінын чукöртчылісны коми велöдысьяс, и сэки подув кывнас шуисны сыктывкарбердса сёрнисикас, сы вӧсна мый сійö гöгöрвоана вӧлі уна коми йӧзлы.

49 удж. Лыддьӧй нӧдкывъяссӧ. Висьталӧй, сёрнисикас либӧ литературнӧй кывйӧн гижӧма? Мый серти тӧдмалінныд?

1. Кык йыы да кык кольча, а шӧрас туу. (Ножич, шыран) 2. Китэг и коктэг вӧрӧта восьтэ. (Тӧв) 3. Сизимдас паськэм пасьталэма, а ставыс кызьтэм. (Капуста кӧчан) 4. Ягэ мунэ – гортэ видзэдэ, а ягысь локтэ – ягэ видзэдэ. (Чер)

· Гижӧй нӧдкывъяссӧ литературнӧй гижӧд кывйӧн.

50 удж. Лыддьӧй сьыланкыв текстъяссӧ, сэсся висьталӧй ас сёрнисикаснад, сьылӧй. Гижӧй сёрнисикас да литературнӧй кывъяссӧ, кӧні эм торъялӧмъяс.

1. Кӧч йӧктӧ, йӧктӧ Мича табъя кокнас, Вый тупыль юрнас, Шабді кудель бӧжнас, Сьӧд сэтӧр синнас, Сыла-госа кывнас, Льӧм пу кор пельнас, Аслас дона кунас.

2. – Кысӧйӧ, нявӧйӧ, Тасьті-пань нюлысьӧй, Выя нянь сёйысьӧй, Джадж дорті ветлысьӧй, Кытчӧ нӧ мӧдін? Мӧді гумла вылӧ. – Мун шыртӧ кутав!

51 удж. Тӧдмасьӧй таблицанас. Висьталӧй, мый серти сетӧма сёрнисикасъяслы нимъяссӧ. Кыдзи шусьӧ тіян сёрнисикасныд?

Коми сёрнисикасъяс – диалектъяс
Комиӧн	Рочӧн (дженьдӧдӧмӧн)*	Кӧні олӧны тайӧ сёрнисикасӧн сёрнитысь йӧзыс
1. Сыктывкарбердса	Присыктывкарский (скр)	Сыктыв ю Эжваӧ усянінын, сыктывкарбердса сиктъясын
2.Эжвагорувса	Нижневычегодский (нв)	Емдін (Усть-Вымский) районса, Сыктывдін районса ӧткымын сиктын (Эжва юбокса сиктъясын)
3. Эжвайывса	Верхневычегодский (вв)	Кӧрткерӧс да Кулӧмдін районъясын
4.Сыктывшӧрса	Среднесысольский (сс)	Сыктывдін да Сыктыв районъясын
5.Сыктывйывса	Верхнесысольский (вс)	Койгорт районын да Луза юбердса сиктъясын
6.Луза-Леткавожса	Лузско-Летский (лл)	Луздор районын
7. Печорайывса	Печорский (печ)	Мылдін (Троицко-Печорск), Вуктыл да Печора районъясын
8. Удораса	Удорский (уд)	Удораын Мозын да Вашка юяс- пӧлӧнса сиктъясын
9. Емваса	Вымский (вым)	Княжпогост районын
10. Изьваса	Ижемский (иж)	Изьва районын, Ухта, Усинск, Чилимдін районъясынПечора районса войвыв юкӧнын, Ненецкӧй Автономнӧй кытшын, Кӧла кӧджын, Из (Урал) сайын

* Дженьдӧдӧм роч нимыс паныдасьлӧ кывкудъясын

Коми сёрнисикасъяслы нимъяссӧ сетӧма сы серти, кутшӧм ю бердын олӧны диалектӧн сёрнитысь войтырыс.

Коми сёрнисикасъяслысь кывворсӧ чукӧртӧма «Сравнительный словарь коми-зырянских диалектов» кывкудйӧ. Кывкудсӧ лӧсьӧдісны коми кыв туялысь учёнӧйяс: Татьяна Ивановна Жилина, Марфа Александровна Сахарова, Валентина Александровна Сорвачёва. Кывкудсӧ вӧлі йӧзӧдӧма 1961-ӧд воӧ Сыктывкарын. 2015 –ӧд воӧ петіс сёрнисикасъяслӧн кык юкӧна выль кывкуд.

52 удж. Тӧдмасьӧй коми сёрнисикас кывкудйысь босьтӧм некымын гижӧдӧн. Медводдза кывйыс – литературнӧй кыв, пӧлӧсӧн гижӧмаыс – сёрнисикас кыв, орччӧн дженьыда пасъялӧма диалект нимсӧ. «Коми сёрнисикасъяс» таблица серти тӧдмалӧй, кӧні тадзисӧ сёрнитӧны.

Видзӧдны вс. вым. печ. скр. сс., видзедны иж. нв., видзедні вв., видзалны лет., видзны лл., видзӧтчыны уд. (Глотово), визьлысьны иж., вийччыны уд.

Гораньӧн ворсны скр. сс., горанен ворсні вв. (Деревянск), син куньӧмӧн ворсны вым., син кӧртэдэн ворсны иж., шлепетаӧн ворсны уд., ыж кутасьны лет. – играть в жмурки.

Дадь вв. вым. иж. лл. печ. скр. сс., дайд нв. уд (Вашка), дайдь уд. (Мезень)

Жбырган вв.нв. печ. скр., бырган вв. вым. скр. уд. (Глотово), журган нв., берган иж., тӧӧ берган иж., парган уд., шурган вым., дыдык уд. (Глотово)

Лабич вв. лл. печ. скр., лабыч вс. сс, лавич вым.иж.нв. уд. – лавка вдоль стены в крестьянской избе (керкаын стен бокас сувтӧдӧм кузь да кыз плакаысь вӧчӧм пукаланін).

53 удж. Мыйла тайӧ текстсӧ пыртӧма «Сёрнисикас» темаас?Лыддьӧй Алексей Поповлысь казьтылӧмсӧ.