Цаһан Сар

– Орҗ герүр

Орман эзлтн.

Цаһана цә

Цуһар эдлтн…

…Цаһана белг

Цугтаднь күртнә,

Цагин булг

Цацлд хүврнә.

Төгәлңдән сәәхн

Тег мануртна.

Хурһдан хәәсн

Хөд мәәллднә.

Зооһин кецд

Зурмд гүүлднә,

Чичкнсн дунь

Чикнд хадгдна.

(Тачин Анҗа)

Цә

Хальмг теегин аһуд

Халун һаң догшн.

Ундасад ирсн күүнд

Уух цәәһинь өгтн.

Алтн өңгтә цәәһән

Ааһан дүүргәд келгит,

Арһсн-земсн чееҗән

Асхрсн көлсәрн девтәһит.

( Калян Санҗ)

______________________________________________________________

Халунд юн сәәнәр күүнә унд хәрүлнә?

Цә уухла, юңгад көлсн асхрна?

Яһад түүрвәч цәәг алтн өңгтә гиҗәхмб?

♦ Харар барлата бәәлһнә нерд эклц кев-янзд хүврүләд, сурвр тәвтн.

♦ Тодрха биш эгшгүдтә үгмүд олтн.

Кедү цә ээҗ уув?

Ээҗ шаазңта хар цәәһин өрәлинь уув. Υлдсн цә деернь үс кеһәд, шаазңгиг хәрү дүүргв.

Тер үстә цәәһин һурвна кесн нег әңгинь ээҗ бас ууһад, үлдсн цә деернь хойрдад үс кеһәд шаазң дүүргв.

Ээҗ дәкәд дүүрң шаазңгин зурһа кеснә нег әңгинь ууһад, шаазңгиг һурвдад үсәр дүүргәд, терүгән эн саамд чиләһәд уув.

– Не, кедү ааһ цә, кедү ааһ үс би уувув? – гиҗ эврәннь ачнрасн ээҗ сурв.

Ямаран хәрү өгхән ачнрнь ухалад, тоолад медв. Тадн, умшачнр, эн сурврин хәрү бас олтн.

Эн юмби? Деерәс ирсн дерсн-хурсн,

Дорас ирсн элвг хар,

Өңгинь ясдг өл буурл,

Амтынь ясдг амр цаһан,

Тавинь хәәдг тарһн шар.