Герин даалһвр

Белтрг толһаһан бәрәд сууна.

– Яһвч? Гемтвч? – гиҗ эцкнь сурв.

– Герин даалһвран кеҗ чадҗахшв.

– Али, үзүллч терүгән.

– Баав, яһсн шулун кечквч!? Ханҗанав, чамд! Ода би цеврәр буулһҗ бичнәв, – гиҗ Белтрг байрлв.

Маӊһдуртнь эсвин кичәлд багш:

– Өцклдүр өгсн герин даалһвриг Белтрг цугтаһаснь чикәр кеҗ. Ода эн самбрур һарад, маднд цәәлһҗ өгх.

Белтрг босад, багшур хәләлго, келв:

– Герин даалһвриг нанд баавм кеҗ өглә.

– Хәләтн, энүг! Хәләтн! Ичкевт! – гиһәд Шаазһаш тачкнв.

– Эцкчн сәәнәр эсв күцәдг бәәҗ, болв тиим дөӊ чамд олз болшго, – гив багш.

Буруһан медсн Белтрг:

–Буйн болтха, гемим тәвтн, тиим йовдл дәкҗ һарһшгов.

– Не, күн гемән медхлә сән! Мадн чамд иткҗәнәвидн, – гиһәд кичәлән цааранднь давулв.

__________________________________________________________________

Яһад Белтрг гериннь даалһвр кеҗ чадсн уга?

Юңгад Белтрг ичв?

Иим йовдл тана классин бәәдл-җирһлд учрну?

♦ Маңһдур, өцклдүр гидг үгмүд ю медүлҗәнә?

♦ Эсв, самбр, эцк, багш гидг бәәлһнә нерд тодрха биш эгшгүд олтн.

♦ Харар барлата бәәлһнә нерд эклц кев-янзд тәвтн, баг киисклһинь келтн.

Сана оруллһн

Багш Монтаг

Босхад сурна.

Киискврин дараг

Келтхә гинә.

Келсән Монта

Кесг давтна.

Уудьврта бәәдлтәһәр

Υүрмүдүрн хәләнә.

Дөңгән болхар

Дорҗ адһна.

Һаргч киискврт

Һаран заана.

Мартгдсан олхар

Монта чирмәнә.

Һаргчин ормд

«Һардг» гинә.

Класс кевәрн

Көштлән инәнә.

Медүләд келснь

Минчиһәд улана.

(Шугран Вера)

_____________________________________________________________

Дорҗ яһҗ Монтад дөң болҗ?

Юӊгад Монта минчиһәд улав?

♦ Эврә нерд олтн, киисклһинь зааҗ келтн.

♦ Киискврмүд дараһарнь келтн.

♦ Уудьврта гисн үгд җөөлн темдгин зокал цәәлһтн.

Көвүн школасн ирәд эцкдән:

- Баав, маңһдур школд мини хург болх.

- «Мини» гиснчн юмби?

- Тер хургт зуг би, чи болн директор орлцх.

– Тиимий? Хургин төрнь ямаран?

– «Терзин шил хамхллһн».