Типикон, стр.315

"Не бо туне, ни якоже прилучися о святых поклонех и молитве умыслиша святии отцы, и церкви устав предаша: но разум имуше во святых поклонех и молитве, с правою мыслию плод имети будем.

И не якоже нецыи не покаряющеся святых отец преданию, ниже ведуше сами искус святых поклонов, ниже святою молитвою добре разумеют молитися, но поклонився единою нагорбився, мало восклоняяся крестяся, главою кивает, и тем своим бесчинием аки чин наполняет преданных от отец поклонов: ниже молитвою умне и душевне к Богу молится, но елико время сгорбився творит суетныя своя поклоны, тако и молитву святаго Ефрема, аки изумленный, спешит проговорити. Такожде и вся молитвы поспешает с поклоны управити, и от тех мнимых бесчестных поклонов, и от безумаго моления своего востанет, аки юрод, ниже сам себе весть, что творил, ниже зрят на предстоятеля церкве, но ин инаго предваряет, мятутся яки тростие ветром колеблеми, не смотря лучшаго ниже хотят научитися: но елико кто како составил свой нрав, тако и утверждается быти. Страшно, обаче реку, да не неведуще отеческаго утверждения имут под запрещения впадати, яже чтется в православную неделю святаго поста, соборное святаго седмаго вселенскаго собора сице: Вся, кроме церковнаго предания и учения и изображения святых, и приснопамятных отец, обновляемая или посем содеянная, анафема. В поклонех же и молитве будем подражательны глаголющему: ибо Бог дух есть, духом и истиною кланяющихся хощет. И божественный и верховный Апостол, иже искус ведый в молитве, глаголет сице: аще бо помолюся языком, дух мой молится, а ум мой без плода есть. Что убо есть; помолюся духом, помолюся и умом. воспою духом, воспою и умом. и паки: хощу, рече, в церкви пять словес умом моим глаголати, нежели тьмы словес языком. И святый Лествичник, воззвах, рече: поя всем сердцем моим, сиречь, телом и духом. божественный же Григорий Синаит глаголет: Начало умныя молитвы действо, сиречь, чистительная духа сила, и тайная ума священнодейства: конец же, изступление и восхищение ума к Богу. И святый Антиох рече: Молитва убо беседа ума к Богу: такого убо требует ума ум устроения, да возможет беседовати к Богу. И паки святый Лествичник: Молитва есть по тоя убо творению, ссуществие и соединение человеков к Богу: И паки тойже рече: Начало убо молитве прилози, единос.човне отгоними от начал самех. Среда же, еже во глаголемых единей быти мысли тоя же совершение восхищение к Богу. Темже мы вей, елико от святых писаний от многих малая сия слышавше вонмем, и не многословим в молитве, яко язычницы, к нимже Христос глаголет: мнят бо ся во многоглаголании своем услышани быти. И паки Лествичник рече: не мудрися в молитвы твоей глаголех: детская бо многажды немования проста и не хитра, отцу их иже на небесех угодиша. Не многословити начинай, яко да не ко взысканию словес разыдется ум, едино слово мытарево Бога умилостиви: един глагол верен разбойника спасе. Многословие убо в молитве многажды ум возмечта, и разлия: единословие же множицею ум собирати может, услаждаемь и поуверзаемь в слове молитвы, пребывай в нем, хранитель бо наш тогда есть моляйся с нами. Темже мы с. трудом, и множеством количества, яко несовершеннии молимся, второе бо первому ходатайственно: даяй бо, рече, молитву чисту без лености, молящемуся скверненне и болезненне. Ибо скверна молитве, и ино погубление и ино крадение, и другое порок. Скверна есть, еже Богови предстояти, и неподобною мыслию мечтатися. Погубление есть, в в попечения неполезная пленятися. Крадение есть, еже нечувственне мысли парити. Порок есть прилог яков-любо тогда нам приближающея. И се зде убо о святей священней и приснопамятней умней молитве конец творим."

+++