Зургудар «Эркн хот» гидг келвр тогтатн

– Тәрән альд урһна?

– Кезә селәнә көдләчнр тәрә тәрнә?

– Кезә тәрән хурагдна?

– Буудя юуһар хурадмб?

– Комбайнд көдлдг күүнә эрдм ямаран?

– Өдмг юуһар болһдмб? Һуйр яһҗ кедмб?

–Хама өдмг болһна? Кен өдмг болһна?

– Болсн өдмг мадн альдас авнавидн?

– Юуг мадн эркн хот гинәвидн?

Олзлх үгмүд: хавр, цасн, трактористнр, тәрә тәрәч (хлебопашец), һазр хаһлҗана, буудя, болвсрх, комбайн, һуйр, өдмг болһдг завод, эркн (главный), өдмгин делгүр, тәрә хуралһн, тәрә цацдг машин, тәрәнә һазр яслһн (удобрение почвы), теермдх.

«Эңкр мини» гидг дууна айсар.

Нигтәр урһсн буудя нәәхлнә.

Нарна күчнд өңгнь шарлна.

Теегм эңдән оштрҗ алтрна. 2д.

Теңгсин усншң сәәхн мелмлзнә.

Һазр эктә алтн буудяг

Һартан авч альхндан имрнәв.

Күндтә хотын дееҗ гиһәд 2д.

Көгшн ээҗин келсиг ухалнав.

(Лиҗин Эрнцн)

Баазр ээҗәсн сурна:

– Ээҗ, юңгад чи «өдмг алтнас үнтә» гиҗ келнәч?

– Күн өдмг идлго бәәҗ чадхий?

– Уга. Мадн өдр болһн өдмг иднәвидн.

– Алтн угаһар бәәҗ болхий?

– Бәәҗ болх.

– Не, юңгад тиигҗ келгдгинь медвч?

– Медүв, медүв. Өдмг – күүнә теҗәл.

– Чик, зуг энүг әрвлҗ эдлх кергтә.