УДК 821.351.43

Редакторгара

ЦIόкъа санна цIи йола кIант,

Лόма санна лир дола кIант,

Хьа цIи ма йожийла лома мелий,

Фу ма хáдалда гила берза мелд!

Йоазонхо мел говза вале а, цун къоалам мел шаьра бале а, вай даьй хинна хоза гIулакх долчча тайпара хьахьокха цун вIаштIехьдаргда аьлча, бакъхеталуц. ХIаьта а, хьамсара книжкадéшар, ер роман яздеш дукха къахьийгад йоазонхочо, из гIулакх тарлучча тайпара хьахьокха лаьрхIа.

ГIалгIай меттаца чам болаш а, из безаш а, цунна тохкамаш деча сага дикка сакъердалургда укхунца: цIенача наьна меттаца яздаьд ер. Цхьаболча нахá духтIабовла хала хургда, аьнна, хетача дешай маIан деш, дошлорг а диллад йоазонхочо ше чакхвоалаш, шийна цох совнагIа къахьегам хиннабале а.

Укх тIа дувц ткъестлагIча бIаьшере даьхача гΙалгΙай къаман хьал: цар вáхар, валар, саг йоалаяр, маьре яхийтар, кхыдар.

Говзача йоазонца духтIавоаккх дIадаьннача а хIанз юкъе лелача а къаман дуккхача хозача гIулакхашта, дикача Iáдаташта. Шуне багIаш, болхаш-боагIаш, нах вIашагIкхийттача мел эздий хиннаб уж бувхача гIирсá, къамаьла, гIулакха. Хьагойт халкъа ловзарашка а яхьашка а мишта дáкъа лийцад.

Къаман кицашца хьахьокх хьаькъал, хьинар, кхетам, ширача замангара хьадоагIа даьй – оалама лоаца, чулоацама доккха – кицáш мишта кхетадаьд. Духхьал хьа а аьнна, фега дIа ца дохийташ, вáхарца дувзаденнача гIулакхашца уж мишта хотташ хиннад. Масала: «Боахамах ахча хилда хьа». Йоазонхочо хьахьокх кицан боккъонца маIан, из сардам болга, цхьаболчар цох ловца лоархIе а.

КIоаргга гойт зIамагIаша боккхагIий сий дар а лерхIам бар а. Мохк вIашагIкхийттача дош áла безам бале а, боккхагIашта бIарахьежá, из юхатохарца, воккхача сага йистхила дагахьа Iаса аййича, цунна мишта терко ю.

Дийшáча наьха сийдар, Iилманцара чам, из Iомаде хьужаре йиллар, дукха ха йоаццаш тIаийцáча бусалба дина нах тIакхéра белгало я. Иштта дунен Ιилманна гIалгIай тΙакхувш хилар гуш да доазол арахьа, Россе шахьарашка цхьаццабола къаман къонгаш деша а, балхаш тIа а хилар.

Саг лозавича е цамогаш хилча, шоай хьинарах тийша ца вуташ, лорага кхайкаро, кхайкача хьавá лор хиларо, лор ший балхах кхеташ хиларо лорал довзаш а цох кхеташ а хилар гойт.

Iаламах а дика кхеташ хиннаб дай. Хургбола хаоттам белгалбеш, ханаш хиннай цар. Из гойт къаьстта укх тΙа дувцача «оагIора éра» яхача дено.

Хьамсара книжкадéшар, укхох дувца дуккха дале а, дIаходар хьога дут аз, Iайха бергба-кх Iа укхун мах! ГIоза а дешалда Iа ер!