О пекшем яйцо на свещи

Некий старец имеяше у себе единого ученика. Во едино время по обычаю своему иде старец в церковь на молитву, единого ученика в келии оставив. Ученик же его, видев яйца лежащи много и чая, яко старец его не скоро из церкви приидет, и взяв едино яйцо, хотяи испещи на углех, но бояся, егда како старец скоро приидет в келию и услышит смрад и оскорбит его. И сице домыслися: взем ниту и яйце по концам увяза и возжег свещу, печаше яйцо на свещи, того ради, дабы смрада в келии не было. Внезапу толкнув в двери старец и в келию вниде, и видев его сице творяше, сварися на него вельми и удивляся новому и необыкновенному печению яйца и рече ему: "Бес ли тя научи тако творити?" Той же поклонився ему и убоявся старца отвеша ему и рече: "Воистину, отче, той мя научил и сотворил". Бес же невидимо в угле храмины начаша вопити: "Напрасно оклевтаеши мя. Аз убо аще и многолетен есмь и многокознен и много прелестен, но сицевые штуки не видев, ниже в уме моем когда помыслил у иного кого прежде сего видех. Сего ради и сам сему присматриваюся и великим удивлением удивляюся". Тогда ученик паде наногу старцу, прося прощения, глаголя: "Простя мя, отче, господа ради, яко ото своея мысли соблазнихся и сотворих сие".

Воистинну не всякому злу демон нас научает,

Егда кой человек сам в злых делех присно пребывает.