Первоенадесять

Иже имут из разных стран, в Наше Царствие разных вер и ересей ученые свободных наук люди приезжати, ради каких нибудь вин, и восхощут в Нашем Царствии жити: и оных в вере разсмотрения силу даем блюстителю училищ, от Нас устроенных, и учителем и свидетельство от них даяти: и кто по их свидетельству каковыя за своя науки чести, или жалования, или достоинства годен; и тем по их свидетельству совершати: а о них же они судят, яко не суть годны в Нашем Царствии, ради в Вере Нашей развращения быти; и оных абие из Нашего Царствия, яко негодных здешняго пребывания, из Царствующаго града выслати за пределы Нашего Царствия. А без свидетельства училищ блюстителя и учителей иностраннымЪ ученым людем, в Наше Царствие приходящим, в их учениях словесных и письменных, яже имут быти восточной Нашей православной Вере и церковным преданиям противны, никому им во оном не верити, и им не согласовати, и до Нашея Царския милости и жалования таковым не допущати. И Нашего Царскаго Величества державы всяких чинов духовным и мирским людем, никому таковых у себе в домех не держати, и их никаковым образом не защищати, дабы вси знали Наше Царское в православной Вере крепкое, и за сохранением Божиим, никоим либо образом зыблемое пребывание, и тоя яко зеницы ока хранение.