Третие

В училище же Нашем быти установляем блюстителю и учителем благочестивым и от благочестивих родителей рожденным и воспитанный во православной Христианской Восточной вере Российскаго и Греческаго народа; Греческаго же народа тии да будут, иже будут о себе имети о своем в Восточной Христианской вере крепком утверждении от православных Патриархов достоверное свидетельство: такожде тии и в России да будут крепце в вере свидетельствовани, дабы кто из них такожде не соделал, якоже прежде еретиков Исидор Российский Митпрополит, иже от Цареградскаго Патриарха и от прочих с свидетельством достоверным, и с великим похвалением к Москве на Митрополию приехал, а послежде на Флоренском соборе с Па­пою Римским согласен явися. А новопросвещенным от Римския веры, и Лютерския и Калвинския, и иных ересей приходящим в тех училищах блюстителю и учителем, ради веры Нашея лучшаго хранения, весьма не быти: ибо они обыкоша злохитростным образом тайно ереси своя по малу во ученики вкореняти.

А иже имут в Наше царствие из Литовския страны и из Малыя России и из иных стран ученые люди, хотящии зде в Наших училищах блюстителем и учительми бытии, приезжати и о себе поведати, яко они благочестивые, и от благочестивых родителей рожденны, и воспитанны в православной Восточной вере: и оным без подлиннаго об них известия и достоверных благочестивых людей свидетельства словесем их не верити, и в блюстители и в учители их не устрояти, аще бы кто из них и писанием правду веры Нашея Восточныя удостоверял, а не правды на ону Нашу православную веру от Римлян и от Лютеров и от Калвинов и от иных ересей наносимыя обличал и укорял: того ради что обычай есть таковыми способы прелестников в верах замешание творити; прежде таковии являются, якобы совершенно благочестивые, и по благочестии ревнители крепкие, а потом егда уверятся быти благочестивыми, тогда по малу развратная словеса вере Нашей всевати, и оныя непорочную целость терзати начинают.