Ямаран өдр?

Нег дәкҗ царцаха* өрүн серәд:

– Яһсн сәәхн чилгр өдрв! – гиһәд эн байрлад, нааран-цааран цецгүд деегүр цервәд ниснә. Һазр дорас бултаҗ һарсн улан хорхад* эн өдр төрүц таасгдсн уга. Тегәд эдн хоорндан зүтклдә бәәҗ муурад, нег негнүрн ууртаһар хәләһәд суув.

Дигтә тер цаглань өөгүрнь шорһлҗн урһмлын эк чирҗ йовҗ. Өдрин дуусн шорһлҗн көдләд, үвлдән идх хотан белдҗәнә.

Царцаха энүнәс сурна:

– Шорһлҗн, буйн болтха, мадна зарһ хаһлҗ өгич.

– Ямаран зарһ?

– Эндр му аль сән өдрий?

– Ода адһҗ йовнав, асхндан нанур күрәд иртн, тер цагт келнәв, – гиһәд шорһлҗн нам зогслго йовҗ одв.

Нарн суусн хөөн царцаха улан хорха хойр сурврин хәрү авхар шорһлҗнур ирнә. Шорһлҗн дала гидг урһмлын эк цуглулад гериннь өөр овалчкҗ. Бийнь көлсән арчад сууна. Ирсн гиичнртән оваһан зааһад шорһлҗн келнә: «Эндр кецү* сән өдр билә, юңгад гихлә би ик олзта болув. Ода би маңһдур күртл таварн амрч чадхув».

(Валентина Осеева)

_____________________________________________________________

Юунас көлтә царцаха улан хорха хойр зүтклднә?

Шорһлҗн ямаран хәрү эднд өгв?

Улан хорхад ямаран өдр таасгдх гиҗ тадн санҗанат?

* царцаха – саранча

* улан хорха – дождевой червь

*кецү – исключительно, чрезвычайно

«Экдән» гидг дууна айсар.