О послании волжских атаманов и казаков, Ермака Тимофеева с товарищи, и ратных людей Строгановых в Сибирь, на Сибирского салтана

В лето 1582 году сентября в 1 день, на память преподобного отца нашего Симеона Столпника, послаша из городков своих Семен и Максим и Никита Строгановы, в Сибирь на Сибирского салтана волжских атаманов и казаков Ермака Тимофеева с товарищи, и с ними собрав из городков своих ратных людей, литвы, и немец, и татар и русских людей буйственных и храбрых предобрых воинов триста человек, и их с волжскими атаманами и казаками отпустиша вместе за едино, и того их собрания учредиша осмь сот четыредесять человек буйственных и храбрых; и отпевши соборное молебное пение Всемилостивому в Троицы славимому Богу, и Пречистой его Богоматери и всем небесным силам и Святым угодникам его, и удоволиша их мздою, и одеянии украсиша их и оружием огненным: пушечки и скорострельными пищальми семипядными, и запасы многими, и всеми сими довольно сподобиша их, и вожев ведущих той сибирский путь, и толмачей басурманского языка им даша, и отпустиша их в Сибирскую землю с миром. Они же атаманы и казаки с приборными людьми, поидоша с радостью в Сибирскую землю на Сибирского салтана, со учреждением полков на очищение Сибирской земли, очистить место и отогнать безбожного варвара. Атаманы же и казак идоша по Чусовой реке вверх до устья Серебряной реки четыре дня, и по Серебряной идоша два дня и дойдя Сибирской дороги, и ту городок земляной поставиша и назва его Ермаков Кокуй городок, и с того места перевезеся 25 поприщ за волок, на реку рекомую Журавли, и по той реке поидоша вниз и вышед на Туру реку: ту бе и Сибирская страна. <…>