Ниитә болхла, чидлтә болдг

Аврлт уга Маңһсас

Арһта һурвн ахнь

Дү күүкән алдулҗ,

Дүүвр нерән дуудлв.

Эс өггдсн ачлвр

Кезәнә һурвн көвүтә, нег күүктә эмгн бәәҗ. Нег дәкҗ ахнрнь аңһучлхар һарад йовна. Эк күүкн хойр гертән үлднә. Асхлад экнь малан хәләхәр һарна. Тер хоорнд Догшн Маңһс күүкиг хулхалад,авад йовҗ одна. Күүкән хәәҗ-хәәҗ, экнь ууляд үлднә. Өрүнднь һурвн көвүнь ирхлә,эк зовлңган келнә.

- Көвүд минь, зовлң учрв, дү күүкндән нөкд болҗ чадхийт? Арһтн юунд?

Ик ахнь келнә:

- Би альд болвчн бултулсн юмиг олҗ чадхв.

Дундк ахнь:

- Би нег хаһад, нисч йовсн шову харвхв.

Һурвдгч ахнь:

- Би деерәс унҗ йовсн юмиг һазрт күргл уга, хавлад авхв.

Ик ахнь келнә:

- Аак, бичә зовад бә. Мадниг күлә.

Тер кевтән һурвулн Маңһсиг хәәһәд һарна. Удсн уга. Ик ахнь үүлн заагт бултсн Маңһсиг олад авна. Дундк ахнь саадгасн хаһад, Маңһсиг алчкна. Һурвдгч ахнь болхла, дү күүкән һазрт күргл уга хавлад авна. Һурвн ахнь дү күүкән герүрн авч ирнә.

Эн йовдлын тускар хотнас-хотнур зәңг тархагдв.

Көгшдүд цуглрад: «Кенд ачлвр өгхмб?» – гиҗ эдн ухална.

- Дундк ахинь ачлхла, ик ахнь Маңһсиг эс олҗ авсн болхла, дундк ахнь кениг хах бәәсмб?

- Бичкн ахинь ачлхла, хойр ахнь эс нөкд болсн болхла, кениг хавлҗ авхмн билә?

Тер цагас авн ода күртл көгшдүд кениг ачлхмб гилдәд зүтклдәд бәәцхәнә.

_____________________________________________________________________

Эмгн кедү күүкдтә бәәҗ?

Күүкиг кен хулхална?

Һурвн көвүн ямаран эрдмтә бәәҗ?

Ахнрнь яһҗ дү күүкән олҗ авв?

Һурвн көвүнәс кенинь ачлх кергтә? Тадн юн гиҗ санҗанат?

«Экдән» гидг дууна айсар.

Ачлврин төлә биш

Арһ чидлән һарһад,

Эрклү дү күүкән 2д.

Эдн сулдхҗ авсмн.

Кенинь ачлхм гиһәд

Көгшдүд уха туңһана.

Зуг ода күртл 2д.

Зүткән төгсәд уга.

Уусн усн урсхлта,