Маръямоль

Коркö важöн öти сиктын олöмны пöрысь гозъя. Налöн вöлöма мичаник авъя Марья нима ныв. Радейтöма сійö сиктса öти гöль зонмöс. Но бать-мамыс Машукöс мырдöн кутöмны сетны верöс сайö озыр семьяö. Дыр бöрдöма-корöма Марья бать-мамыслысь, медым эз сетны сійöс пöрысь озыр морт сайö. Но эз кывны бать-мамыс нылыслысь корöмсö. Крут берег дорын, кöні бöрдіс Марья, мыччысис гöрд рöма мича дзоридз. Йöзыс шуисны тайö дзоридзсö Марьямольöн. «Марья» – ныв ним серти, «моль» – дзоридзыслöн быд ар артмö сьöд рöма моль кодь кöйдыс.

Лыддьы да вуджöд роч кыв вылö.

Пион артмöма греческöй paionios кывйысь. Вежöртö ‘бурдöдысь, дзоньвидзалун сетысь’. Пионöн шулöмаöсь бурдöдысьöс. Грецияын вöлöма Пион нима тöдчана бурдöдысь, Асклепий енлöн велöдчысь.

Асклепий – Грецияын бурдöдчöмлöн ен.

{ Степень петкöдлысь урчитанъяс вочавидзöны ёна-ö? юалöм вылö.

вель – довольно, достаточно

вывті – слишком

дзик – совсем

ёна – очень

зэв – очень

Маръямоль – зэв мича дзоридз.

Катшасинъяс ёна мичмöдöны Коми мусö.

Кöч тöлысьын пувйыд дзик нин гöрд.

Уразнöй турун вывті колана быдöнлы.

Лыддьы да гöгöрво висьтсö. Инды степень петкöдлысь урчитанъяс.

Содты сёрникузяясö колана степень петкöдлысь урчитанъяс.

Ичöт челядь купайтчöны … берег дорын.

Школаса рыт колис … кыпыда.

Ми … радлім гожся каникулъяс матысмöмлы.

Велöдчысьяс … бура гижисны тöдöмлун донъялан удж.

Тулыснас школа гöгöр челядь пелькöдчисны … дыр.

Висьма кö, ме дінö врачöс энö корöй,

Бурдöдчанторла эн котöртöй пыр,

Ачымöс лэччöдлöй Кунес ю дорö,

Кöні быд видз лыдтöм дзоридзöн тыр!

Лапкорйöн шонтыштöй позялöм морöс,

Кöчвöньöн кöртыштöй калганлысь вуж,

Шонді мед жалиттöг синъясöс ёрö,

Кöтöдлас синваöс лысва и пуж.

Ог кö на бурд, ладан турун сэк пуöй,

Кöкакань шырöй да вотыштöй оз,

Чай пыдди медбур лекарство моз юа

Ю весьтö öшöдчöм сьöд сэтöр роз.

Шудöй кö яндысьтöг эновтас дзикöдз,

Сэки на эскöмöй аслам оз кус…

Егырысь корсьöй, ме воа кö пикö,

Мырпом, кöть некымын бурдöдан тусь.

Лыддьы да аддзы бурдöдчан турун нимъяс. Корсь небöгъясысь, мыйысь найö бурдöдöны.